என்மேல் ஏன் கோபம்?
கடந்த முறை விட்டு சென்ற
காயங்கள் இன்னும் ஆறவில்லை
என் உதடுகளில்!
காதலின் வடு,
ஆறிவிட வேண்டாம்
என துடிக்கிறது என் இதயம்!
மீண்டும் முயற்சிக்கலாம்,
ஆறிவிட வேண்டும்
என துடிக்கிறது உன் இதயம்!
போன இரவு வரை
உன் வன்மம் தெரியவில்லை
ஈர உதடுகளில் தான்
முத்தமாக மொத்தமாக
தேங்கியுள்ளது என!
நெருப்பு கக்கும் உதடுகளை
நாவால் அடிக்கடி ஈரப்படுத்திக்
'கொள்'
நான் வரும் வரை
பின்னர் என்னைக்
'கொல்'!
மறந்துவிட்டோம்
மீண்டும் முத்தமிடலாம்
என் உதடுகளில் தேங்கிய
உன் உயிரையும்
உன் உதடுகளில் தேங்கியுள்ள
என் உயிரையும் மீட்க!
எமதர்மா, என் உயிரை
எடுக்க பாசக்கயிறு
தேவையில்லை
ஒரே ஒரு முறை
இவளை
முத்தமிடச் சொல்!
கவனம் தேவை தர்மா,
மீண்டும் இவளை
முத்தமிட அனுமதித்தால்
மீட்டு விடுவாள் என் உயிரை!
துடிப்பதை மறந்த இதயம்
முதலுதவி தேவை
அடக் கடவுளே,
அப்போதும்
அவள் இதழால் தானே
மூச்சு அளிப்பாள்!
முத்தத் தீவிரவாதி நீ,
காயமின்றி முத்தமிடலாம்
என்பது தானே
முத்த உடன்படிக்கை,
நீ மீறிவிட்டாய்
நான் முத்தம் இடுகிறேன்
நீ முத்தம் எடுக்கிறாய்!
கண்களின் கோளங்கள்
கன்னாபின்னாவென சுழல்வதும்
இதயத்தை சுத்தியலில்
யாரோ அடிப்பதும்
கை, கால்களின்
எலும்புகள் உதறுவதும்
நுரையீரல் காற்றுக்காக
துடிப்பது வெளியே
கேட்பதும் போதும்
நான் செத்துவிடுவேன்!
தயவுசெய்து
நீ முத்தமிடுவதை நிறுத்து.
சண்டையிட்டுக் கொள்ளலாம்
என்று இருந்தால்
மூன்றாம் உலகப் போரே
ஆரம்பித்து இருக்கும்,
உதடுகளின் மீது மற்ற பாகங்கள்!
****************
டிஸ்கி: மொத்தம் எத்தனை முத்தம் என்று சொல்பவர்களுக்கு, இந்த கவிதையை(இது கவிதையா? என்று யாரும் கேட்காதீர்கள், ப்ளீஸ்) காப்பிரைட் எடுத்துக் கொண்டு காதலியிடம் சீன் போடுவதற்கு அனுமதி வழங்கப்படும்.
**************
முத்தம்..முத்தம்..முத்தம்..
உன்னை ரசிப்பதால் வாழ்கிறேன்!
வீணையும் பிடிக்கும்
கிதாரும் பிடிக்கும்
பார்க்கும், கேட்கும் ஒவ்வொரு
முறையும் அது உன்னை தெரிவிக்கும்
அதை இரண்டும் மீட்டத் தெரியாமல்
விழிக்கிறேன், உன்னையும் சேர்த்து
ஒருவேளை அதனால் தான் பிடிக்குதோ!
திறந்த கதவின்வழி தென்றல் வருவதில்லை
வரும் தென்றலை ரசிக்க முடிவதில்லை
சில விநாடிகளுக்கு மேல்
சாளரத்தின் இடுக்குகளில் கசியும்
சுகந்தம் உயிரை உருக்கும்
என்னை உன்னில் மீட்டும்!
பின்னிரவு பனியும் பிடிக்கும்
அடைமழையும் பிடிக்கும்
இரண்டையும் ரசிக்க முடியும்
தூரத்தில் இருந்து மட்டும்
இதன் ஏகாந்தத்தை முழுமையாக
அனுபவிக்க எப்போதும் வேண்டும்
உன் நினைவுகள்
உன்னை ரசிப்பதால் வாழ்கிறேன்
ஒவ்வொரு நொடியும்
உன்னை ரசிக்கும் மனதின்
பண்பட்ட தொடர்புகள் இவை
இவை மட்டுமல்ல
தொடர்புகள் நீளும், அவை
முற்றுபெறாத கவிதையின்
முதல் பக்கமாக மட்டுமே
எப்போதும்!
உன்னைப் பற்றி தோன்றும்
கிறுக்குத்தனங்களும் எழுதும்போது
கவிதையாக கை கால் முளைத்து
உயிர்பெறும் ஆச்சரியம்
புரியவில்லை,
ஆனால்
ஒன்று மட்டும் தெரியும்
கவிதைகளை கிறுக்கும்
எவருக்கும் விடைதெரியாது
இந்த ஆச்சரியத்திற்கு!
பார்க்கும் ஒவ்வொன்றிலும்
உன் நினைவுகள்
என் பார்வையே உன்னுள் ஊடாக
தான் வெளியே செல்கிறது
விழியில் உன்னை இருத்திவிட்டாயோ
என குழப்பம், ஆனந்த குழப்பம்
ஒருவேளை அதனால் தான்
உன் நினைவுகளோ
பார்க்கும் ஒவ்வொன்றிலும்
உன் நினைவு தொடர்புகளின்
சிறகுகள் என்னை விட்டு
உதிர்ந்த நாட்களில்
என் பெயர் பிணம்!
******************
